Абай облысының әкімі Берік Уәли Семей қаласындағы бірнеше нысанды аралады. «Омбы-Майқапшағай» автожолынан «Северный» логистикалық орталығына дейінгі жол мен Қарағайлы шағын ауданындағы тұрғын үйлердің құрылысымен танысты.

Ұзындығы 1,5 шақырымды құрайтын төрт жолақты жол магистральдық санатқа жатады. Жоба аясында инженерлік желілерді қайта жаңарту, жол төсемін салу, сыртқы жарықтандыру орнату жұмыстары қарастырылған. Құрылыс биылғы жылдың тамыз айында толық аяқталмақ.

Семей қаласы әкімінің міндетін атқарушы Бекжан Бапышев аймақ басшысына Қарағайлы ықшам ауданының жол желілерін дамытуға қатысты жоспарын ұсынып, жаңадан бірнеше көше салу бойынша жоба әзірленіп жатқанын айтты.

Облыс әкімі бастамаға қолдау білдіріп, Қарағайлы шағын ауданының инфрақұрылымын жаңғырту бағытындағы жұмысты жалғастыру керектігін атап өтті.

Қазіргі таңда аталған ықшам ауданда 9 қабатты 18 кредиттік тұрғын үй салынып жатыр. Оның он үшінің құрылысы былтыр басталған. Жыл соңына дейін пайдалануға беріледі деп жоспарланып отыр. Ал қалған 5 үйдің құрылысы жақында аяқталады.

Облыс әкімі Қарағайлы ықшам ауданында салынып жатқан тұрғын үйлерді аралап, мердігерлерге құрылысты мерзімінде әрі сапалы аяқтауды тапсырды.